العُهر

اذا بتاخذ كل شي بالمزح، بيصيرو العالم يقولو عنّك كركوز. واذا بتاخذ كل شي بالجَدّ، ايه بيقولو عنَّك نِكِد.

كتير منيح.

ما يلي كونوا اكيدين انّو لا مزح ولا تنكيت، واذا حدن تَنَكَّد ايه بيكون احسن.

العُهر

بقلم سمير طربيه

شو هو العُهر؟

العُهر بشكل اساسي هو كل شي ناتج عن الجزء الاجتماعي من نفسية الانسان وتمّ خلطه مع نظرّيات سياسية وافكار من القرون الوسطى او عصر الانوار (enlightenment).

يعني مثلاً بن لادن عُهر. جورج بوش ونادي الأخلاق الحميدة (بأعضائه طوني بلاير وجاك شيراك وانجيلا ميركل وغيرهم...) كمان عُهر. القيّم الغربية من ديمقراطية وليبرالية والوقوف بالصّف والأكل بلا خبز والحكي على صوت واطي وبلا انفعال وشوبَرة، ايه هيدا عُهر. المظاهرات "الحضارية" مع رقص وحشيشة ومطالبة بالسلام العالمي والحب والغرام كمان اذا بتفكّر فيها عُهر.

لبنانيو الاغتراب في عواصم اوروبا ومدن امريكا الشمالية والجنوبية وفي افريقيا وبالخليج العربي، هول عُهر وبزيادة مؤامرات.

الدوري الانكليزي كتير عُهر.

اوبرا وينفري عُهر.

نظرية نشؤ الأمم عُهر.

صراع الحضارات نوع من تصادم عدّة انواع من العُهر.

البكاء تأثراً بموت فقمة أو لأنّو طوم هانكس طلع معو سرطان بآخر الفيلم أكيد أكيد عُهر (البكاء على الأطلال على فكرة مش عُهر. هيدا شي حلو).

الموضة: عُهر.

ايران: عُهر بألوان فاقعة.

القطاع المصرفي: عُهر مع فائدة.

الدعايات: عُهر.

الصّيد في الماء العَكِر: اكيد عُهر لأنّو اصلاً ما في شي بالماء العَكِر يا اخو الشرموطة!

طيّب. كتير منيح. شو اللي منّو عهر؟

الأكل.

 الأكل مش عهر. بس انتباه! الانسان الجوعان وبدّو يأكل مش يعني انّو والله جوعان جايي عبالي فخد بطّة مع صلصة الخوخ وثلاث حبّات بازيلّلأ راكبين على جزرة... لا لا لا عبّاس. جوعان يعني شي ربطة خبز وعلبة مرتديلا زوان، أو شي ربطة خبز ومرطبان زيتون، أو ربطة خبز مع شو ما كان بسّ حتّى ما نغصّ عالخبز الحاف...

♠    ♠    ♠

الى كلّ شخص شَعَر انّو هيدا النّص سخيف و"كليشيه" ويخلو من الجماليات الأدبية (مع انّو اكيد الجميع ضدّ الجوع وما بدّن حدن يكون جوعان لأنّو حرام وحق كل انسان يعيش والخ الخ الخ) الى كل هيك شخص: بلا عُهر.